Este pasado
verán perdemos a Agustín Fernández Paz, dun xeito ou doutro a súa obra sempre
está preto de nós, no día a día do instituto. As temáticas achegadas ós
intereses de adolescentes, as rapazas intelixentes e fortes protagonistas dos
seus libros, o noso pasado máis inmediato, son valiosos fitos na lectura e nos
comentarios posteriores.
Por mor de
todo isto, desde o departamento de Lingua Galega e o Equipo de normalización
lingüística decidimos, neste primeiro
trimestre, achegarnos á vida e á obra de Agustín Fernández Paz. Para
ambientarnos, realizouse un mural coas portadas de moitas das súas obras
acompañadas polo seu retrato de David Pintor.
Nas clases
de 1º ESO limos varios contos de “Contos por palabras” e a historia de Hadrián
en “O raio veloz”. Buscouse información sobre a súa vida e amosámola nun mural
feito de datas relevantes e de premios recibidos. Sabendo do devezo de Agustín
polo cine encadramos a información en claquetas.
Co
estudantado de 2ºESO lemos inicios de varias obras e varios dos seus contos.
Escoitamos, en youtube, a charla que Agustín deu no IES de Fene no ano
2008, sobre como facía el para escribir as súas historias e de onde lle viñan
as ideas. Despois, partindo dos diferentes títulos dos seus libros e escollendo
varios crearon diferentes minirrelatos con resultados ben acaídos.
Nos grupos
de 3º e 4º da ESO recibiron unha invitación a ler algunha das diferentes
novelas de Fernández Paz que hai nos andeis da nosa biblioteca. Rematada a
lectura escollían un anaco que lles gustara especialmente e partillábano no
mural do corredor.
Finalmente,
lemos e comentamos o texto “Os ríos da vida” que Agustín escribiu para o Día do
Libro do ano 2012 e recollemos estas palabras súas para poñer o ramo a esta
crónica:
Din
que todas as persoas necesitamos as historias, tanto coma a auga que bebemos,
tanto coma o pan de cada día. Que sorte, que sexan tan doadas de conseguir! Só
hai que abrir un libro e deixarse arrastrar polo río das palabras, esas que fan
nacer dentro de nós outros mundos e outras vidas.